Qamqorlyqtyń naqty kórinisi jurtshylyq kóńilinen shyǵyp otyr     

Qazaqstan Respýblıkasy Premer-Mınıstriniń orynbasary Berdibek Saparbaev 25 maýsym kúni jumys saparymen Aqmola oblysynyń Esil jáne Jarqaıyń aýdandarynda boldy. Vıse-premer, eń aldymen, Aqmola oblysynyń ákimi Ser­geı Kýlagınniń bastaýymen Kras­nogor aýyldyq okrýgindegi Kalachı eldi mekeninde bolyp, uıqy sındromy oryn alǵan aýyldyń búgingi tynys-tirshiligine kóńil bóldi. Osyǵan baılanysty Ber­dibek Máshbekuly Kalachı orta mektebinde aýyl turǵyndarymen kezdesý ótkizdi. Respýblıkalyq jumys toby­nyń ókilderi, múddeles mınıs­trlikter men oblystyq ve­domstvolardyń basshylary qa­tys­qan jıynda Aqmola oblysy ákiminiń birinshi orynbasary Qadyrhan Otarov keńeıtilgen habarlama jasady. Onyń aıtýynsha, uıqy sındromy kórinis bergen 2013 jyldan beri osyndaı 170 oqıǵa tirkelip, 133 adam dárigerlik kómekke júgingen. Jergilikti dárigerlik ambýlatorııa­da táýlik boıy jumys isteıtin, 10 tósektik eki palata jabdyqtaldy. Ol Esil aýdandyq aýrýhanasynyń dárigerlik-medbıkelik brıgadasymen nyǵaıtylypty. Kalachıdiń árbir turǵyny medısınalyq baı­qaýdan ótkizilip, olardyń den­saýlyǵy týraly jeke pasporty men áleýmettik kartasy re­sim­delgen. 2015 jylǵy 1 maýsymdaǵy má­limet boıynsha, Kalachı aýylynda 532 adam tursa, onyń 283-i eńbek qabiletindegi, 130-y zeınetker, 15-i múgedek, 73-i oqýshy, 26-sy mektep jasyna deıingi balalar jáne beseýi stýdent eken. Sondaı-aq, áleýmettik kartany daıyndaý barysynda turǵyndardyń 15 paıyzy Kalachıde tirkelmegeni, 30 paıyzynyń turǵyn úı men jyljymaly múlikke quqyqtyq qamtamasyz etý qujattarynyń joqtyǵy anyqtalǵan. О́kiletti organdar bul másele boıynsha qosymsha jumystar júrgizip jatqany aıtyldy. Oryn alǵan jaǵdaıǵa baılanysty Aqmola oblysynyń ákimdigi Kalachı men Krasnogor tur­ǵyn­daryn oblystyń Esil jáne Derjavın qalalaryna, ózge de aýyldyq okrýgterine qonys­tandyrý týraly sheshim qabyl­daǵan. Bul jóninde arnaıy jumys toby Kalachı men irge­les Krasnogor kentiniń árbir turǵynymen erikti suraý salý áńgimesin ótkizip, kóshi-qon máselesine qatysty túsi­nik jumystary júrgizildi. Nátı­je­sinde, 2015 jylǵy 19 maý­symǵa deıin 65 otbasy (176 adam, 54 bala) basqa eldi meken­der­ge qonys aýdarypty. Buǵan qo­symsha, «Jumyspen qam­týdyń jol kartasy-2020» baǵ­dar­la­ma­symen turǵyn úı salýǵa bıýdjetten 2 mıllıard teńge qarjy qarastyrylyp otyr. Qazirgi ýaqytta Esil qalasynda 118 páter­lik eki úıdiń qurylysy, Jar­qaıyń aýdanynyń ortalyǵy Der­javın qalasynda 75 páter­lik turǵyn úıdiń qaıta qury­lysy jobasy júzege asyrylýda. Esildegi úılerge 101 otbasy (josparlanǵany 118 páter) qonys­tanýǵa tilek bildirip otyr. Kalachı jáne Krasnogor kentindegi taǵy da 165 otbasy múshelerin Derjavın qalasyndaǵy 75 páterlik úıge kóshirý jónindegi másele qa­rastyrylýda. Jalpy, atalǵan eldi mekenderdiń turǵyndaryn kóshirý men medısınalyq qamtamasyz etý oblys ákimdigi tara­pynan aıryqsha baqylaýda ustalýda. Jınalysta aýyl turǵyndary Vıktor Krıýkov, Lıýbov Govdıı, Vıktor Lýkıanenko, Vera Pry­tıka jáne Ulttyq radıasııa ınstıtýtynyń dırektory Ser­geı Lýkashenko sóz alyp, kóshi-qon, turǵyn úı men jyljymaıtyn múlikti zańdastyrý, ǵyly­mı taldamalardyń barysy tý­raly pikirlerin bildirdi. Son­daı-aq, respýblıkalyq ju­mysshy tobynyń jetekshisi, Ener­getıka mınıstriniń orynbasary Talǵat Aqsalbıevtiń atqar­ǵan jumystary týraly esebi tyń­daldy. Vıse-premer men oblys áki­mi kezdesýge qatysýshylardyń kóp­tegen suraqtaryna jaýap qaıtardy. Berdibek Saparbaev jýr­nalısterge bergen suhba­tynda aýyl turǵyndary men balalardyń densaýlyǵy bári­nen bıik turatyndyǵyn, uıqy sındromynyń tolyqtaı anyqtal­maǵynyn eskere otyryp, olardy oblys ákimdigi belgilegen eldi mekenderge kóshirý, jumyspen jáne áleýmettik usynymdarmen qamtamasyz etý qajettigin atap ótti. Elbasy tapsyrmasyna sáıkes, Úkimet bul maqsattarǵa qazirdiń ózinde 1,5 mıllıard teńge bólip otyr. Qalǵan qarjy kózderi de qarastyrylýda. Sonymen birge, ol kóshirilgenderdi qabyl­dap, tıisti jaǵdaı jasap otyrǵan sha­rýashylyq basshylary men jergilikti bılik ókilderine alǵy­syn bildirdi. Úkimet basshysynyń orynbasary sapar barysynda Esil jáne Derjavın qalalarynda Kalachı men Krasnogor turǵyndaryna arnalyp salynyp jatqan turǵyn úı qurylystarynda, basqa da nysandarda bolyp, áleýmettik sala qyzmetkerlerimen májilis ótkizdi. Baqbergen AMALBEK, «Egemen Qazaqstan». Aqmola oblysy.